Tíðindi

BÓKAFRAMLØGA FRÍGGJADAGIN 29. AUGUST

Fríggjadagin verður spennandi bókaframløga av nýggju krimi- og ræðusøguni ‘Hevnd’, sum Petur Reinert Mohr hevur skrivað. Í framløguni kemur rithøvundurin at tosa um bókina, og lesa brot upp úr henni. Møguleiki verður at fáa bókina signerða.

Framløgan byrjan kl. 17.

—

Hevnd er ein skaldsøga um at missa alt – og velja at taka alt aftur.

Í august kemur debutskaldsøgan Hevnd út – ein myrk og psykologisk søga skrivað av Petur Mohr Reinert, ein nýggj rødd í føroyskum bókmentum, sum fer at gera vart við seg við sínum kompromisleysa málburði og ógvusligu søguskriving.

Søgan snýr seg um happing og hevnd. Hon gongur fyri seg umborð á einum ímyndaðum frystitrolara, í Sørvági og í Havn. Hóast søgan tekur støði í hesum staðarnøvnum, hevur hon onga tilknýting til veruligar hendingar ella persónar. Alt er íspunnið. Tema er happing, sum fer av sporinum, og hvussu tann happaði velur at hevna seg.

Hevnd er fyrsti partur í eini trilogi, og lesarar skulu ikki bíða leingi eftir næsta parti.

Petur Mohr Reinert hevur áður skrivað nógv, men hetta er hansara fyrsta skaldsøga. Úrslitið er ein søga, sum bæði er rá og rørandi, og sum setur spurningin: Er tað rætt at hevna seg?