Tíðindi
Fleiri enn 100 ár á baki
Hóast handilin Skilling er ein sera nýmótans handil at trína inn í, so er Skilling ein av elstu handlum í landinum.
Mangan verður tikið til, at fólk eldast væl. Nakað tað sama kann man siga um handilin Skilling í SMS, tí tað er yvir 100 ár síðani, at handilin varð settur á stovn.
Hava fremstu tøknina
Í dag eru tað tær báðar Elin Patursson og Elvira Thomsen, sum eiga og reka Skilling í SMS. Tær eru báðar útbúnir optikarar og starvaðust báðar í handlinum, áðrenn tær á heysti í 2024 keyptu handilin frá fyrrverandi eigarunum.
- Tað var faktisk nokk so lætt at taka avgerðina um at keypa handilin, tá ið vit fingu møguleikan. Vit vóru her báðar frammanundan, og sum útbúnir optikarar var hetta eisini tað, sum vit ynsktu, greiða tær báðar frá.
Í dag eru tað tilsamans seks fólk, sum hava fast starv í Skilling, og av teimum eru ikki færri enn tríggir optikarar. Harafturat eru eini fimm fólk afturat, sum á ein ella annan hátt eru knýtt at handlinum.
Gera forkanningar fyri eygnalæknar
Hjá Skilling hava tey eisini tætt samstarv bæði við optikaraketuna Nyt Syn, men eisini við ein eygnalækna í Hørsholm, soleiðis at tær hjá Skilling gera forkanningar fyri eygnalæknan, áðrenn føroyingar til dømis fara niður at operera eyguni.
- Tað ger tað lættari fyri viðskiftafólkið, tí vanliga fer man fyrst niður til eina forkanning, og síðani fer tú niður aftur til sjálva operatiónina. Við loysnini hjá okkum ber til at gera forkanningina her, og so bara fara niður til operatiónina. Tað er høgligari og sjálvandi eisini bíligari, greiða tær báðar Elvira Thomsen og Elin Patursson frá.
Harumframt kunnu tey hjá Skilling eisini gera spesiallinsur til fólk, sum eygnalæknar her í Føroyum senda til teirra.
- Vit hava sera nýmótans tøkni, so vit hava nógvar møguleikar, og eisini nógvar møguleikar, sum fólk ikki vita um, siga tær báðar at enda.
